التدوينه زي ماهو واضح انو كيف يكون لبسك محتشم وبنفس الوقت انيق ..
وانا ماحطيت الموضوع عشان الاناقه تتعارض مع الاحتشام ابدا
..فيه محتشم انيق وفيه غير محتشم برضو أنيق ...
والتدوينه هذي باحاول احط افكار لو عجبك اللبس غير المحتشم المذكور انفا
وحبيتي تخلينه محتشم قدر الامكان ايش ممكن تلبسين<كم محتشما
في ذلك هههه <بايخه ( فيس متفشل )
طبعا احب اذكر فالبدايه اني ماراح اعرض الافكار الاعتياديه
يعني زي البلازر والجاكيتات بانواعها الجلد وغيره لانو اتوقع
شي تعرفونه من زمان مو محتاج اجي اقولكم عنه ..
وبرضو فيه نقطه ثانيه مهمه جدا اتمنى تنتبهون لها
انو انا باعرض افكار فاللبس اللي عندك ممكن تمشي معاه الفكره
وممكن لا .. كله راجع لذوقك ولديزاين اللبس يعني زي مثلا
فيه افكار تمشي الفساتين الكوكتيل بس ماتمشي مع فساتين سهره
وهكذا وطبعا احس اصعب شي انو تسترين فستان سهره
بس انا بطرح كم فكره يمكن تعجبكم ويمكن تنفع مع فساتينكم ...
ونقطه اخيره انو بالذات لفساتين السهرات حاولي يكون ساتر
من نفسه لانو صعب شوي تسترينه بس لو مالقيتي مثلا ان شاء الله
تنفعك الافكار اللي باطرحها ...
وخلونا نبدا
١- الكيمونو :
الكيمونو اللي هي القطعه اللي كانوا يلبسونها فشرق اسيا
اللي تكون زي الروب كذا .. هذي القطعه دارجة جدا حاليا وفي
منها شتوي صوف وحياكة وكذا وفي منها صيفي ..
وفي منها الطويل وفي منها القصير وكم طويل وكم قصير وفيه
شي بهدب واشياء بدون وكذا ...
عاده يكون فري سايز ومايكون طويل مره ...
الفكره انو ممكن تلبسين تحته بنطلون وتي شيرت
او فستان قصير وتقدرين تضيفين له حزام عشان يكون اكثر
حشمه وممكن بدون برضو
زي كذا كيمونو اسود وبنطلون بوي فريند وبرضو البناطلين البوي
فريند دارجة وجميله مريحة وواسعه .. وتوب رمادي وجزم سبور ..
وكذا مع فستان وممكن تضيفين الحزام يعطي طلة جميله وانيقه للبس
هنا تنسيق لي للكيمونو
الكيمونو طلبته من أسوس رمضان اللي فات .. هنا الكيمونو مفتوح
وهنا اضفت له حزام طبعا تقدرين تضيفين نوع الحزام اللي تبغينه ..
٢- البشت
متوفر فالمولات وكذا بتلاقينه عند المصممات واسعاره شوي غاليه
.. بس في قطع رهيبه تنسيقه عاده يكون زي فكره الكيمونو
مع تي شيرت وبنطلون او مع فستان وهذي صور لتصاميم
بشوت نسائية حسابها موجود ع الصور
هنا شايفين كيف تربطه ممكن يكون مره مسكر وممكن يكون مفتوح فالنص
وهذي برضو صوره ثانيه لنفس المصممه ..
٣- الشيرت تحت الفستان :
طبعا حطيت موضوع كااامل عن هاللوك وهو موضه ودارج
اللحين لو حابين ترجعون له هذا الرابط
http://myqueenmemo.blogspot.com/2014/11/blog-post.html
وهنا تنسيق مقترح من الموضوع واذا حبيتوا التفاصيل طبعا ارجعوا للموضوع
٤- ربط القميص حول الخصر :
طبعا الطيبين بيذكرون هالحركة هههه وكيف كنا نخق زمان
على اللي يسويها ايام القناة السعودية الثانيه ههههه ...
لحسن الحظ الموضة هذي رجعت وموب بس كذا لا ممكن تربطين
سويتر .. كارديقان .. اللي تبغينه
تقدرين لو لابسه بنطلون جينز وموب حابه يكون شكل جسمك واضح
تربطينه ع الخصر .. وترا حتى دارج مع الفساتين والتنورات
وانتي لو تبغينه للتستير اكثر فتقدرين تستخدمين شيرت حجمه كبيره
عشان يغطي اكبر منطقه متاحه ههههه
سويت لوكين مقترحات
هنا سويتر بيج مع قميص كاروهات طبعا تربطين القميص حول الخصر
وهنا بدال القميص سويتر بالوان بارزه ..
هنا سويت تنسيق مره بسويتر
طبعا غضوا البصر عن ماشي مو ماشي لانه اقرب سويتر قابلني ههه
هنا مع قميص جينز
لو قماش القميص خفيف تقدرين تدخلينه بمكان الحزام بالبنطلون برضو حركة جميله
٥- فساتين السهرات :
هنا باقترح كم فكره وباحط صورهم وهم صور لفساتين غالبا زهير مراد
وفيه منهم صور قديمه شوي يمكن من ٢٠١١ بس برضو
الفكره ممكن تستخدمينها لو حبيتيها
هنا الكيب الفخم زي كذا طريقه راقيه للتستير بس المهم انك
تختارين قماش فخم ويناسب فستانك وتفصلينه عند مصممه
التوب اللي زي كذا فكره حلوه تكون زي القطعه تلبسينها
ع الفوستان الافضل تكون من نفس لون الفستان اختاري النقشات اللي
حابتها احس بيكون خياطتها سهل جدا
هنا لو عندك فستان فيه شغل وطيات من تحت وفوق مافيه شي بارز
تقدرين تفصلين او تشترين (لان اذكر كان زارا عندهم قطعه زي كذا )
قطعه تكون كروب توب قصتها كذا واسعه مشغوله
وتلبسينها فوقه .. جميله ودارجة جدا
برضو لو سويتي تنسيق من التنسيقات اللي فاتو صوري
وحطي لي منشن وتاق ع حسابي بالانستقرام
@queenmeeemooo
..
لو حبيتوا فكره الموضوع بلغوني .. لو حابين بين فتره
والثانية ان شاء الله احط لكم افكار زي كذا سواء موضوع بالمدونه
او انزلهم بالانستقرام
ووووبس
ليست هناك تعليقات:
إرسال تعليق